Category: Dhamma

මිත්තානිසංස සුත්‍රය

1. යම් පුද්ගලයෙක් මිත්‍රද්‍රෝහී නොවේ නම් හෙතෙම තම නිවසින් බැහැර යම් තැනකට ගියේ නම්, බොහෝ කන බොන දෑ ලබයි. ඔහු ඇසුරු කොට බොහෝ දෙනෙක් ජීවත් වෙති.
2. යමෙක් මිත්‍රද්‍රෝහී නොවේ නම් හෙතෙම යම් රටකට යේද, නියම් ගමකට හෝ නුවරකට යේද, ඒ හැමතැනම හේ පුදනු ලැබේ.
3. යමෙක් මිත්‍රද්‍රෝහී නොවේ නම් ඔහුට සොරු ළං නොවෙත්. රජ තෙමේ අවමන් නොකෙරේ. ඔහු හැම සතුරන් මැඩ පවත්වති.
4. යමෙක් මිත්‍රද්‍රෝහී නොවේ නම් සාමකාමී සිත් ඇතිව නිවසට පැමිණේ. මිත්‍රද්‍රෝහී නො වන පුද්ගලයාගේ අපමණ වූ ගූණ සභාවේ පවා කියති. හෙතෙම නෑදෑයින්හට උතුම් වේ.
5. යමෙක් මිත්‍රද්‍රෝහී නොවේ නම් හෙතෙම අනුන්ට සත්කාර කොට අනුන්ගෙන් සත්කාර ලබන්නෙක් වේ. අනුන් කෙරෙහි ගෞරව සහිත වූයේ ඔවුන් විසින් ගරු කරනු ලබන්නේ ද වේ. ලෝකයා තමාගේ ගුණ වැයුම හා යසස උසස් කොට නගාලන්නේ ද වේ.
6. මිත්‍රයන් පුදන තැනැත්තා ඔවුන් විසින් පුදනු ලබන්නේ ද වේ. බුද්ධාදී කළ්‍යාණ මිත්‍රයින්හට වඳින තැනැත්තා, තෙමේ ද වැඳුම් ලබන්නෙක් වේ. හෙතෙම කීර්තිමත් වේ.
7. යමෙක් මිත්‍රද්‍රෝහී නොවේ නම් හෙතෙම දිලිසෙන ගිණි මෙන් යස ඉසුරු පිරිවර සැපතින් සපිරි වේ. දෙවියෙකු මෙන් බබළයි. ශ්‍රියා කාන්තාව විසින් අත් නොහරින ලද්දේ වේ.
8. යමෙක් මිත්‍රද්‍රෝහී නොවේ නම් ගව පාලනය සාර්ථක වේ. කෙත්වත් වපුලතාක් පැළ හටගනී. යහපත් දරුඵල පිහිටයි.
9. යමෙක් මිත්‍රද්‍රෝහී නොවේ නම් දැදුරෙන් හෝ පර්වතයෙන් හෝ ගසින් හෝ යමකින් වැටුනේ නම් ඒ ක්ෂණයෙන් පිහිට ලබයි.
10. යමෙක් මිත්‍රද්‍රෝහී නොවේ නම් හෙතෙම වැඩුණු මුල් හා නුග අරලු ඇති නුග රුකක් සුළඟින් සොලවා බිමි හෙලන්නට නෙහැක්කා සේ සතුරන් විසින් ඔහු මඬින්නට නොහැකි වෙත්.